Reali shet futbollist për 100 Euro

Real Madridit vetëm gjatë kësaj vere ka shpenzuar mbi 60 milionë euro për sjelljen e futbollistëve të rinj. Por në shitjen e futbollistëve situata nuk është e njëjtë. Skuadra e Jose Mourinho së fundmi e ka shitur mesfushorin Marcos Tebar te ekipi i kategorisë së dytë spanjolle, Girona, për dëmshpërblim simbolik prej 100 Eurosh.

Tebar 23-vjeçar është prodhim i Akademisë së Real Madridit. Ai i ka kaluar 12 vjet në klubin madrilen, ndërsa me skuadrën e re ka firmosur kontratë trevjeçare. Në kontratë është paraparë opsioni që Madridi ta blejë sërish Tebarin, nëse ai tregohet i suksesshëm te Girona në dy vitet e ardhshme.

Mesfushori Tebar ishte njëri nga futbollistët e ftuar nga trajneri Jose Mourinho për turneun e zhvilluar kohë më parë në SHBA. Megjithatë, ai nuk arriti të gjente vend në skuadrën plot me yje.

Për këtë arsye portugezi Mourinho dha dritën jeshile për shitjen e mesfushorit të dalë nga shkolla e Madridit.