MP3 player pa asnjë tast

Kompania Coby ka vendosur që thjeshtësinë e MP3 playerëve ta ngrit në një nivel të ri. Modeli i tyre MP570 në shikim të parë nuk ka asnjë tast për menaxhim.
Coby MP570 MP3 player ende nuk është në shitje e tanimë ka tërhequr vëmendjen e shumë njerëzve. Përdoruesit që çmojnë estetikën e lavdërojnë për dizajn të thjeshtë dhe të bukur për sy, e ata që çmojnë pikëpamjet teknike janë të hutuar sepse nuk e kanë të qartë si futet në funksion kjo pajisje.

Fotografitë e këtij MP3 playeri të ri nuk shfaqin asnjë tast i cili do të shërbente së paku për të lëshuar dhe ndaluar riprodhimin e muzikës. Besojmë se do të jetë pikërisht kjo enigmë e cila do të rris interesimin për produktin e ri të kompanisë Coby.

Prodhuesi thekson se MP570 ka kapacitet të flash memories prej 2 gigabajt e cila nuk mund të zgjerohet më shumë me anë të kartelave, riprodhon vetëm audio formatet MP3 e WMA dhe ka bateri të integruar e cila mbushet dhe ofron vetëm pesë orë riprodhim të muzikës.

Specifikat e tij nuk janë aspak revolucionare nuk do të tërheqin vëmendjen e njerëzve të cilët e adhurojnë teknikën, prandaj besojmë se Coby llogarit ekskluzivisht në tërheqjen estetike të MP3 playerit të vet të ri. Data e fillimit të shitjes dhe çmimi ende nuk dihen.