Interi zhytet në krizë, Milani ngjitet në krye

Interi duket se është zhytur në një krizë totale, pas dëmtimeve të shumta që e kanë goditur në këtë fazë të sezonit. Pas barazimit zhgënjyes me Breshian, mbrëmë zikaltërit nuk kanë shkuar më shumë se një rezultat 1-1 në fushën e vështirë të Leçes. Duke parë mungesat e shumta ishte e qartë se për skuadrën e Benitez do të ishte një transfertë e vështirë, por Interi duket se ka humbur edhe një nga cilësitë e tij më të mira, mbajtjen e rezultatit. Në “Via del Mare”, kampionët e Italisë ishin të parët që shënuan me anë të Diego Militos në minutën e 76-të, por vetëm 3 minuta më pas Leçe arriti të barazonte shifrat, pas një goditje këndi. Një mundësi e shpërdoruar për skuadrën e Benitez, që tashmë e sheh veten 3 pikë larg kushërinjve të Milanit në tabelën e renditjes. Po ashtu, shenjat në prag të derbit të së dielës nuk duken aspak të mira, duke qenë se zikaltërve u mungojnë një pjesë e madhe e titullarëve.
Milani
E ndërsa Interi është ndalur në Leçe, Milani nuk ka gabuar përballë Palermos. Siçilianët ishin kthyer në një mace te zezë për kuqezinjtë në vitet e fundit, por mbrëmë skuadra e Alegrit ka ditur të fitojë 3-1, ndonëse jo me aq lehtësi sa tregojnë shifrat. Në pjesën e parë ishte Aleksandre Pato që kaloi Milanin në avantazh, ndërsa Palermo barazoi me anë të Baçinoviç në të dytën. Më pas Pato doli jashtë i dëmtuar, ndërkohë që Ibra shënoi golin e dytë për Milanin, duke mposhtur Sirigun nga pika e penalltisë. Llogaritë u mbyllën nga Robinjo 7 minuta para fundit. Fitorja e mbrëmshme i jep Milanit vendin e parë në Serinë A, me 23 pikë, 1 më shumë se Lacio.
Ndeshjet
Në takimet e tjera të luajtura mbrëmë, spikat disfata 1-0 e Lacios në fushën e Çezenës. Pa Hernanes, bardhekaltërit e kanë patur të vështirë të ndërtojnë diçka përballë Bogdanit me shokë. Fitorja e Çezenës ka qenë e merituar, ndërkohë që goli vendimtar u shënua nga Parolo 5 minuta para fundit. Një fitore e rëndësishme edhe për Romën, që triumfoi 3-2 ndaj Fiorentinës në “Olimpiko”. Verdhekuqtë arrijnë fitoren e tretë radhazi në kampionat dhe tregojnë se e kanë lënë pas krizën. Simplisio, Borrielo e Perrota shënuan për Romën, ndërsa Xhilardino e D’Agostino shkurtuan dy herë shifrat. Ndeshja ka qenë një spektakël i vërtetë, por në fund ka fituar skuadra vendase, që tashmë i shkon shumë pranë kreut të renditjes. Fitore e rëndësishme edhe për Napolin, që ka mundur 0-1 në transfertë Kaljarin. Goli i Lavecit në minutat shtesë i ka dhënë skuadrës që drejtohet nga Maxarri, vendin e tretë në renditjen e Serisë A, duke kaluar kështu Interin dhe Juventusin. Tri pikë ka marrë edhe Katania, që mundi 1-0 në shtëpi Udinezen.