Ronaldo: “El Classico”, ndeshje si gjithë të tjerat

Ylli portugez i Realit tenton të ulë rëndësinë e përballjes me Barcelonën në “Kamp Nou”, por thekson se skuadra e tij do të bëjë të pamundurën për të dalë me tri pikë. Në pritje të sfidës gjigante, madrilenët mbajnë kreun e La Ligës me një pikë avantazh ndaj rivalëve të përjetshëm. Skuadra e Mourinjos nuk njeh humbje në të gjitha aktivitetet në këtë sezon dhe Ronaldo është plot besim se kjo seri pozitive do të mbetet e paprekur edhe pas duelit të së hënës mbrëma ndaj skuadrës katalanase.

“Edhe pse është një ndeshje e rëndësishme për të dyja skuadrat, mbetet thjesht një ndeshje tjetër në kalendarin e kampionatit”, citohet të ketë thënë portugezi në faqen zyrtare të klubit në internet. “Kemi një pikë më tepër se ata dhe do të jetë një ndeshje e vështirë. Por kam besim se do të marrim një rezultat pozitiv. Nuk është një finale, pasi ka ende shumë ndeshje për t’u luajtur”.

Megjithatë, 25-vjeçari është i vetëdijshëm për forcën e kundërshtarit, sidomos në “Kamp Nou”. “Janë ekip i vështirë për t’u mposhtur – theksoi ai -. Kanë pak a shumë të njëjtin grup gjatë viteve të fundit dhe në shtëpi janë gati të pathyeshëm. Kanë dëshmuar se do të jenë rivalët kryesorë në luftën për titull, por ne kemi punuar fort dhe po luajmë mirë. Po kalojmë moment pozitiv, që shpresoj të vijojë edhe në ndeshjen ndaj Barcelonës”.

Talenti iberik vuri në dukje ndryshimet në mënyrën e lojës mes dy ekipeve: “Jemi shumë të ndryshëm e njëherësh shumë të ngjashëm. Të dy jemi në gjendje për të fituar kampionatin, por luajmë futboll në mënyrë të ndryshme. Ne synojmë t’i afrohemi zonës kundërshtare me shpejtësi dhe t’i mbyllim ndeshjet sa më parë të jetë e mundur. Kemi identitetin tonë, nuk kopjojmë askënd dhe do të vijojmë kështu. Kjo do të na japë rezultate”.