Topi kërkon liberalizim vizash edhe për Kosovën

Presidenti i Shqipërisë, Bamir Topi, gjatë një pritje të organizuar për trupin diplomatik të akredituar në Shqipëri, tha se Shqipëria shënoi një sukses historik me liberalizimin e vizave për qytetarët, që pas shumë dekadash fituan të drejtën për të lëvizur të lirë, natyrisht duke respektuar rregullat dhe afatet kohore në zonën Shengen.

Topi ka thënë se e drejta për lëvizjen e lirë në kontinentin e vjetër u duhet dhënë edhe qytetarëve kosovarë, në mënyrë që në rajon të mos krijohen ishuj.

“Urojmë që e njëjta gjë të ndodhë edhe për qytetarët e Kosovës, në mënyrë që shteti i ri të mos mbetet njollë e zezë në rajon”, tha Topi, transmeton Top Channel.

Presidenti tha gjithashtu se Shqipëria përmbushi detyrimet e saj si anëtare e NATO-s dhe veçoi kontributin e dhënë në Afganistan. Topi tha se sfida kryesore që pret Shqipërinë në këtë vit të ri është marrja e statusit të vendit kandidat, në mënyrë që vendi të afrohet akoma më shumë Evropës.

“Viti 2011 do shënojë një tjetër hap vendimtar, për të marrë statusin e vendit kandidat, duke shkurtuar rrugëtimin tonë integrues në familjen evropiane. Jemi të vetëdijshëm se asgjë nuk do të na jepet si dhuratë, por me marrjen e pyetësorit ne do t’i plotësojmë detyrimet tona”.

Presidenti shqiptar i dërgoi një mesazh klasës politike shqiptare, duke i kërkuar të gjejë gjuhën e përbashkët.

“Aktorët politikë të gjejnë maturinë dhe të rivendosin dialogun. Interesi i qytetarëve dhe i vendit duhet të qëndrojë mbi gjithçka. Vetëm duke qenë të matur dhe të ndershëm mund të shkojmë në familjen evropiane”, tha presidenti, duke shtuar se zgjedhjet e 8 majit duhet të mbahen në një klimë të qetë politike.