FIFA sot shpallë futbollistin e vitit 2010

FIFA do të shpallë sot futbollistin e vitit 2010. Për herë të parë sivjet FIFA dhe revista France Football do të japin një çmim të përbashkët dhe pikërisht ky unifikim i çmimeve që nga viti 2010 e tutje do të bëjë që fituesi i “Topit të Artë” të jetë vërtet futbollisti më i mirë në botë dhe çmimi të mos kontestohet nga (pothuajse) askush.

Revista France Football ka caktuar çmimin e quajtur “Topi i Artë” për futbollistin më të mirë në Europë që nga viti 1956 dhe për vite me radhë ky ka qenë çmimi më prestigjioz i futbollit evropian, meqë për të kanë votuar gazetarët nga e tërë Europa, të cilët kanë qenë bashkëpunëtorë të France Football.

Deri më 1995 për këtë çmim kanë mundur të garojnë vetëm futbollistët nga vendet europiane, kurse më pas çmimi është “hapur” edhe për futbollistët nga kontinentet tjera që luanin në Europë. Në anën tjetër FIFA ka filluar të nderojë futbollistin më të mirë në botë që nga viti 1991 dhe ndryshe nga France Football, që çmimet zakonisht i ka dhuruar në dhjetor, FIFA këtë gjithnjë e ka bërë në janar të vitit pasues.

FIFA më 2001 ka filluar të nderojë edhe futbollisten më të mirë të vitit. Meqë sivjet çmimi i emëruar zyrtarisht “Topi i Artë i FIFA-s” do të dhurohet për herë të parë, ka pasur edhe një ndryshim në përpilimin e listës së ngushtë të kandidatëve për fituesit e mundshëm.

Fillimisht 23 futbollistë ishin të nominuar për këtë çmim, kurse në luftë të ngushtë tani gjenden emrat e vetëm tre futbollistëve, duke bërë që evenimenti t’i ngjajë më shumë asaj të FIFA-s sesa të France Football. Ajo që sivjet është shumë e veçantë, përveç bashkimit të këtyre çmimeve, është edhe fakti se të tre futbollistët e nominuar në listën e ngushtë janë lojtarë të të njëjtit ekip, Barcelonës.


Lionel Mesi

Lionel Mesi, sipas shumë njerëzve, futbollisti më i mirë në botë dhe lojtari më kreativ në futbollin modern, është fitues aktual i këtij trofeu (edhe “Topit të Artë” të France Football edhe trofeut të FIFA-s) dhe sivjet ka pasur po ashtu një sezon të shkëlqyeshëm, duke u shpallur kampion i Spanjës me Barcelonën dhe fitues i Superkupës spanjolle. Mesi po ashtu ka qenë golashënuesi më i mirë në Spanjë në sezonin 2009/2010 dhe golashënuesi më i mirë në Europë për këtë sezon. Futbollisti argjentinas ka mesatare prej një goli për çdo ndeshje, që është shifër e shkëlqyeshme, kurse çasti më i ndritshëm i vitit për të ka qenë padyshim shënimi i katër golave në Ligën e Kampionëve në takimin ku Barcelona mposhti Arsenalin 4-1. E vetmja arsye pse Mesi sivjet mund të mos shpallet futbollisti më i mirë në botë për herë të dytë me radhë, është mossuksesi i tij me Argjentinën në Kupën e Botës. Në Afrikë të Jugut, Argjentina e prirë nga trajneri Diego Maradona, i cili kishte besim të plotë te Mesi, u eliminua në çerekfinale pas humbjes turpëruese 4-0 me Gjermaninë.


Andres Injesta

Në anën tjetër Andres Injesta ka qenë një prej atyre futbollistëve të cilët kanë arritur të shquhen në Barcelonë; ndonëse, në një ekip ku luajnë yjet më të mëdhenj të futbollit modern, kjo gjë nuk është aspak e lehtë.

Sukseset me Barcelonën janë të njëjta si edhe për dy bashkëlojtarët e tjerë të nominuar për këtë çmim, kurse ajo që e veçon Injestën nga konkurrentët e tij është motivi më i madh, meqë për shkak të problemeve me formë fizike ai shpesh i ka nisur ndeshjet nga stoli, ose nuk ka luajtur 90 minuta të plota, por ka arritur të jetë një prej lojtarëve më me ndikim në Barcelonë. Loja e tij me përfaqësuesen e Spanjës është një tjetër histori. Ai ka qenë thjesht i shkëlqyeshëm me fanellën e kombëtares panjolle dhe lojën e tij e ka kurorëzuar duke shënuar golin e fitores në finalen e botërorit me Holandën. Injesta ka qenë pjesë edhe e 11-shes ideale të botërorit dhe e vetmja “njollë” në kandidaturën e tij për “Topin e Artë” është fakti që dëmtimet e kanë përndjekur duke mos i dhënë mundësi që të japë maksimumin.


Ksavi Hernandez

Nëse lexohen me kujdes fjalitë për dy futbollistët e parë të nominuar për këtë çmim, del se favoriti kryesor për të fituar epitetin e futbollistit më të mirë në botë për vitin 2010 është Ksavi Hernandez. Çdo sekondë e ka kaluar në fushë. Ka përshkruar çdo metër me vrap dhe çdo milimetër i pasimeve të tij duhet matur me sensorë për të kuptuar në ka gabuar qoftë një të vetëm, duke u bërë edhe njeriu me më shumë pasime të sakta dhe njeriu-asist më i mirë në botë. Ç’është e vërteta edhe në skuadër edhe në përfaqësuese, ai ka sulmues fenomenalë, të cilët pasime të tij i shndërrojnë në gola, por vlera e këtij mesfushori, sidomos viteve te fundit, është gjithnjë në rritje, kurse loja e tij në botëror e tregoi këtë më së miri. Duke bërë më shumë se 500 pasime të sakta në kampionatin Botëror dhe duke qenë asistues i dy golave që Barcelonës i dhanë fitoren 2-0 në “Bernabeu” ndaj Real Madridit, Ksavi është plejmejkeri më i mirë në botë dhe sivjet kjo mund të mjaftojë që ai ta fitojë “Topin e Artë”. Tashmë 30-vjeçar, ai ka edhe përvojën dhe karakterin për të qenë një mesfushor dhe një lider i shkëlqyeshëm. Nëse ka një kleçkë që nuk shkon në kandidaturën e tij, ka të bëjë me faktin se Ksavi ka mbetur disi në hije, duke u mjaftuar vetëm me shërbimin ndaj të tjerëve, pa synuar të shënojë vetë gola.