Eto: Golat e mi, për titullin kampion

Samuel Eto shpreson që golat e shënuar prej tij t’i shërbejnë Interit për të fituar titullin e gjashtë radhazi në kampionatin italian.
13 gola larg rekordit sezonal me një klub (36 në sezonin 2008/2009 me Barcelonën), sulmuesi kamerunas shqetësohet për ecurinë e Interit në kampionat, më tepër se për arritjet personale. “Më tepër se të arrij rekorde personale, synimi im është të fitoj me skuadrën”, pohoi “Mbreti luan” në një intervistë për “Inter Channel”.

“Prandaj të luftosh për kampionatin është më bukur se të shënosh shumë. Besojmë te kampionati dhe duhet të punojmë për t’ia dalë. Do punojmë fort në stërvitje dhe do luftojmë në çdo ndeshje për ta bërë të mundur atë që për momentin nuk duket e tillë. Mund të humbasësh, të fitosh apo të barazosh, por duhet të hysh me mendësinë e duhur dhe të provosh fitoren”.

Ish-sulmuesi i Barcelonës vlerëson maksimalisht sfidën e sotme kundër Çezenës në “San Siro”, e cila mund t’u japë mundësinë zikaltërve ta çojnë në -6 diferencën e pikëve nga “kushërinjtë” e Milanit. “Kur do të fitosh, nuk ka ndeshje më shumë apo më pak të rëndësishme”, nënvizoi kapiteni i përfaqësueses së Kamerunit.

“Kundërshtarët janë të gjithë njëlloj. Ndonjëherë ka skuadra që në letër janë më të forta, e disa më të dobëta. Por ne synojmë përherë tri pikët. Prandaj nuk e kemi të vështirë të përqendrohemi te Çezena, kundër së cilës nuk duhet të gabojmë”.

Në fund, një dëshirë e shprehur për skuadrën me të cilën dëshiron të mbyllë karrierën: “Dua ta përfundoj te Majorka, ku jam rritur edhe si njeri. Pastaj do të më pëlqente të bëhesha trajner i Interit, pse jo edhe drejtues, që të mund të fitoj në të gjitha rolet e botës së futbollit. Do të doja edhe të përmirësoja jetën e njerëzve në Afrikë, do provoj”.