Reali i pakënaqur me hetimet

Drejtori i përgjithshëm i Real Madridit, Jorge Valdano ka akuzuar UEFA-n se ka veçuar klubin për dënim pasi Federata Evropiane e Futbollit njoftoi se trajneri Jose Mourinho dhe katër futbollistë të tij do të hetohen për sjellje të pahijshme.

UEFA njoftoi se ka nisur hetimet pas dyshimeve se futbollistët e Realit, Xabi Alonso dhe Sergio Ramos ishin ndëshkuar qëllimisht me kartonin e dytë të verdhë në ndeshjen e Ligës së Kampionëve kundër Ajaxit, të martën, që i suspendon ata për takimin e parëndësishëm ndaj Auxerre dhe do të pastrojë rekordin e tyre disiplinor për fazën e grupeve të garës.

Iker Casillas dhe Jerzy Dudek po ashtu duhet t’iu përgjigjen akuzave pasi ata dyshohet se luajtën rol në transmetimin e mesazhit nga trajneri Mourinho te dy futbollistët. Ramos dhe Alonso të dy u ndëshkuan me kartonin e dytë të verdhë, për vonesë të lojës në minutat e fundit të takimit të fitores 4-0 në Amsterdam Arena. Mirëpo, Valdano beson se në të kaluarën rastet e ngjashme nuk janë trajtuar në mënyrë të njëjtë nga UEFA.

“Nuk mund të hyjë në detaje, por ka pasur shumë futbollistë të cilët kanë bërë diçka të ngjashme dhe nuk janë dënuar. Juninho ishte gjobitur. Ibrahimoviç dhe Samuel në Inter bënë diçka të ngjashme, nuk ekziston mënyrë për t’u bazuar në rregullore. Ajo çfarë ndodh në Real Madrid, ndodh edhe në klubet e tjera, por ata UEFA nuk janë kaq të ashpër”, deklaroi Valdano për Cadena Ser.