Reali nën pushtetin magjik të dyshes portugeze

Dyshja portugeze, Hoze Murinjo dhe Kristiano Ronaldo, janë protagonistët e mëdhenj të Realit të Madridit me gjigantin spanjoll që po i shtyp kundërshtarët e tij në shtëpi dhe jashtë saj, duke qenë në krye të kampionatit spanjoll dhe në grupin e e tij të Ligës së Kampioneve.

I LUMTUR - Reali shkatërroi Santanderin 6-1 në “Santiago Bernabeu” të shtunën e kaluar, për të rikonfirmuar vendin e parë me Ronaldon që shënoi për herë të parë katër gola në një ndeshje te vetme e duke realizuar tetë gola në tri ndeshjet e fundit. “Unë jam vërtet i lumtur, pasi nuk kisha shënuar kurrë më parë katër gola”, - tha Ronaldo. “Megjithatë, gjëja më e rëndësishme është skuadra dhe kurrë nuk do të kishte qenë e mundur të shënoja pa ndihmën e tyre. Unë duhet të përshëndes ekipin. Disa nga shokët e ekipit ishin më të mirë se unë ashtu siç dhe trajneri tha se nuk ka arsye për të qenë euforikë. Është një rrugë e gjatë përpara dhe të qenit në krye është e rëndësishme”.

FAT I MADH - Ronaldo, 25 vjeç, pati probleme në fillim të sezonit, teksa golat nuk po vinin, madje u kritikua jo pak nga tifozët e “Santiago Bernabeut”, se ai ishte prapa skuadrës. Qysh kur Ronaldo u kritikua, Reali ka shënuar 16 gola – me Ronaldon që ka realizuar tetë prej tyre – në tri ndeshjet e fundit në Ligën spanjolle dhe në fitoren 2-0 kundër Milanit në Ligën e Kampioneve. Formacioni i Hoze Murinjos është i pamundur në të gjitha kompeticionet dhe ka sulmin dhe mbrojtjen më të mirë në Spanjë. “(Hoze) Murinjo është fantastik. Falë Zoti ai erdhi”, - tha Ronaldo. “Është gjithmonë diçka e madhe të punosh përkrah dikujt me eksperiencën e tij dhe që ka fituar shumë tituj gjatë gjithë karrierës. Unë gjithmonë kam thënë se do të isha i lumtur të stërvitesha prej tij dhe shokët e mi janë të lumtur
gjithashtu”.

IMPAKT I MADH - Murinjo ka pasur një impakt të madh te Madridi qysh kur ai erdhi nga Interi i Milanos gjatë verës dhe fansat kënduan emrin e tij pas shkatërrimit të Resingut. “Ne jemi një ekip, që me kalimin e kohës, mund të bëhet një ekip i madh dhe të fitojë tituj”, - tha Murinjo. “Ne jemi ende larg për të qenë në ekip perfekt dhe për momentin nuk kemi fituar asgjë dhe për më tepër që jemi ende larg të fituarit diçka. Ne kemi vetëm një kohë të shkurtër që jemi së bashku, por ky projekt është i vlefshëm për katër vjet”. Gjithçka është duke shkuar mirë për Realin, por trajneri Murinjo nuk dëshiron që trupa e tij të heqë këmbën nga pedali. “Ekipi është në një moment të madh dhe ne duhet të vazhdojmë kështu, nuk kemi kohë për ta shijuar atë”, - tha ish-trajneri i Çelsit. “Kur njerëzit janë të lumtur ata e harrojnë lodhjen dhe problemet dhe vazhdojnë të jenë me një atmosferë pozitive”. Detyra e radhës e Realit të Madridit është ndeshja në 1/16 në Kupën e Mbretit kundër Mursias, ditën e martë. Reali nuk e ka fituar Kupën e Mbretit qysh nga viti 1993, por Murinjo parashikon të lërë pushim disa nga yjet kyçe të skuadrës.