Evropa plakë pret rininë shqiptare

Jemi në Evropë me të mirat e këqijat tona. Kontinenti i vjetër, me moshën mesatare dy herë më të lartë se vendet që e rrethojnë, pret së shpejti rininë e freskinë shqiptare, me defektet dhe virtytet që e karakterizojnë. Ne fitojmë lirinë dhe dinjitetin e lëvizjes, por dhe evropianët nuk fitojnë pak, madje fitojnë atë që aq shumë dëshirojnë dhe reklamojnë: rininë, që nuk ka GDP e lartë ta modifikojë. Plakja e Evropës nuk është vetëm një realitet statistikash, por një situatë e prekshme për këdo që ka kaluar pak kohë në një qytet evropian. Sa energji të reja duhen për të asistuar të moshuarit 80-90 vjeçarë. Në Itali, kërkesa që nuk arrin asnjeherë të plotësohet (edhe pas hapjes së kufijve të Maqedonisë, Bullgarisë, Rumanisë, Serbisë..) është ajo e kujdestarëve të moshës së tretë. Evropa është e pasur, por pa forca për të ecur përpara. Sa energji duhen për të ruajtur mjeshtërinë dhe eksperiencat e rralla që aplikohen nga artizanët e mjeshtërit evropianë: marangozë, punues të xhamit, muratorë, por dhe lulishtarë. Profesione shumë dinjitoze, që evropianët e moshave të reja e mesatare kanë harruar dhe refuzuar t’i bëjnë.
Një vit më parë, një shoqatë shumë e rëndësishme e artizanatit italian, me mundime e burokraci të besdisshme, arriti të punësojë në Itali muratorë dibranë, shumë të zotët në ngritjen e mureve me gur, në të thatë. Eshtë e vërtetë që sot për sot nuk mund të qëndrohet më shumë se 90 ditë në një vend evropian, por janë të gjitha mundësitë për të krijuar kontaktet e duhura, për të shkëmbyer eksperienca dhe më pas, për të ndërtuar, sipas të gjitha rregullave, bashkëpunime afatgjata. Një nga industritë më të zhvilluara dhe më të suksesshme italiane, ajo e xhamit, mbahet dhe nga shqiptarët e ish-fabrikës së xhamit në Kavajë, që eksperiencën e tyre e vazhduan në punishtet artizane të Italisë verilindore. Xhami i muranos shkëlqen sot edhe falë frymës së dhjetëra punëtorëve shqiptarë. Po kështu dhe degë të ndryshme të restaurimit, si mozaikët, kanë duart e shqiptarëve, përqëndrimin dhe dëshirën e ringjalljes të së bukurës. Po veç punës e rinisë, a do të kalojë gjë tjetër? Sigurisht, në mollët e kuqe e të mira, në mes qëllon dhe ndonjë me krimb. Me dhënien e vizave shqiptarëve, të gjithë janë të fituar.