Nora: Kënga Magjike jo-korrekte ndaj kosovarëve

Vetëm pak ditë para natës finale të “Kënga Magjike” organizatorët e këtij festivali kanë diskualifikuar nga gara treshen nga Kosova, Linda Halimi, Nora Istrefi dhe Big D.
“Arsyeja ishte për shkak të vonesës sonë në prova atje, ndonëse ato nuk ishin as prova gjenerale dhe se nga provat finale na ndanin edhe dy ditë. Atë ditë provat i kishim në orën 10. Ne drejt Tiranës u nisëm në mëngjes, por për shkak se atë ditë pati shumë shi dhe mjegull, u vonuam gjatë rrugës. Në fakt më shumë u vonuam në komunikacionin e Tiranës, ishe një vonesë 40 minutëshe dhe atje nuk patën aspak konsideratë, ndonëse udhëtuam gjatë për ato prova”,ka bërë të ditur Nora Istrefi për të përditshmen “InfoPress”.

“Isha e ftuar nga Linda Halimi dhe shkova për hatrin e saj pasi e kam mike shumë të mirë. Po më dhimbset ajo, sepse punoi shumë, po më dhimbset publiku që nuk do të ketë rast të shohë një performancë çfarë e kemi përgatitur. Po më duket jo-korrektësi ndaj kosovarëve, nëse mund të shprehem kështu. S’kam koment që për një vonesë të tillë të na largojnë. Ende më duket si një ëndërr e keqe dhe e pa besuar”, ka përfunduar Nora