Topi: Vizat, shqiptarët të ndërgjegjshëm për detyrimet

Shqipëria e shikon Italinë si një partner të rëndësishëm strategjik dhe mbështetëse të fortë në rrugën e saj për realizimin me sukses të aspiratës për integrimin e vendit në Bashkimin Evropian- ka vlerësuar presidenti i Shqipërisë, Bamir Topi.
Gjatë një vizite pune në Itali, presidenti Topi dhe delegacioni i tij zyrtar u pritën në Bashkinë e Pratos nga kryebashkiaku Roberto Çeni, nga përfaqësuesit e Këshillit Komunal si dhe nga qindra qytetarë, në mesin e të cilëve kishte shumë bashkatdhetarë, të cilët i rezervuan kreut të Shtetit një pritje mjaft të ngrohtë, vëllazërore dhe emocionuese.

Presidenti i njohu këto autoritete me disa prej zhvillimeve më të fundit dhe reformave në Shqipëri në drejtim të konsolidimit të institucioneve demokratike, fuqizimit të kuadrit ligjor si dhe përmirësimit të klimës së biznesit në vend.

Në të njëjtën kohë, Topi bëri një panoramë të atmosferës optimiste të krijuar në vend pas vendimit për liberalizimin e vizave për Shqipërinë me BE-në, duke theksuar se shteti dhe qytetarët shqiptarët janë të ndërgjegjshëm për sfidat dhe detyrimet që rrjedhin nga ky vendim.

Nga ana e tyre, autoritetet më të larta vendore të Pratos dhe përfaqësuesit e shoqatave të ndryshme ekonomike të rajonit vlerësuan vizitën e kreut të Shtetit shqiptar si një pikë kulmore e zhvillimit të marrëdhënieve të gjithanshme mes dy vendeve duke nënvizuar rolin e rëndësishëm që luan edhe bashkësia e madhe në numër e emigrantëve shqiptarë në Itali, të cilët shërbejnë si ura lidhëse mes dy popujve dhe që me sjelljen dhe arritjet e tyre kanë dhënë një kontribut thelbësor në drejtim të marrjes së vendimit për liberalizimin e vizave.