Gripi stinor, mjekët këshillojnë vaksinat

Tiranë - Situata epidemiologjike në vend për sa i përket gripit stinor aktualisht paraqitet normale, ndërsa vërehet një trend në rritje i rasteve me viroza stinore.
Ndërkohë, me nisjen e sezonit të gripit, strukturat shëndetësore apelojnë për aplikimin e vaksinës tek e gjithë popullata, sidomos për grupet më në rrisk, si fëmijët, të sëmurët kronikë me sëmundje pulmonare, kardiovaskulare, etj.

"Fëmijët kanë imunitet të dobët për të përballuar virozat", pohojnë mjekët, të cilët këshillojnë prindërit që t'i vaksinojnë fëmijët e tyre. Vaksinimi kundër gripit sezonal i mundëson trupit të krijojë mbrojtje nga virozat dimërore, që pritet të qarkullojnë. Specialistët e shëndetit publik këshillojnë që vaksina duhet të përdoret brenda muajit dhjetor jo vetëm nga grupet e rriskut, por nga e gjithë popullata.

Vaksinimi i përvitshëm kundër gripit sezonal është mënyra më e thjeshtë dhe me kosto-efektive për t’u mbrojtur nga ky virus. Sipas epidemiologëve, nuk duhet të aplikojnë vaksinën personat, të cilët kanë reaksion të fortë nga disa produkte ushqimore, kryesisht veza, si dhe ata persona që janë me temperaturë dhe simptoma gripale.

Këta të fundit duhet të presin rikthimin në gjendje normale për aplikimin e vaksinës. Sa i takon situatës aktuale të gripit në vend, epidemiologët bëjnë me dije se janë rreth 12 mijë raste me simptoma respiratore të sipërme dhe të poshtme në të gjithë vendin.

Ndërkohë, nuk janë regjistruar forma të rënda të tij. Me nisjen e sezonit të gripit, Instituti i Shëndetit Publik si çdo vit ka trajnuar epidemiologët në të gjithë vendin për informacionet shtesë në lidhje me vaksinën, e cila del çdo vit e re, raportimet dhe standardizimin e tyre, etj.

Vaksina kundër gripit sezonal, që tashmë gjendet në farmaci, është hedhur në treg nga tre kompani prodhuese. Ajo kushton 1 200 lekë dhe duhet të injektohet nga bluzat e bardha. Sipas rekomandimeve të Organizatës Botërore të Shëndetësisë dhe Rrjetit Europian të Survejancës së Gripit (EuroFLU) sezoni i virozës së gripit fillon në muajin tetor dhe zgjat deri në maj të vitit të ardhshëm.