Dhunimi i varreve, Prokuroria çon në gjyq kreun e Omonia-s

Korçë – Prokuroria e Korçë ka përfunduar hetimet për dhunimin e varreve në fshatin Boboshticë, skandal i ndodhur gjatë muajit të shkuar.
Në bazë të hetimeve, shkaktarë të dhunimit të varreve janë Naum Disho, kryetar i Degës si Omonias Korçë, Alqi Koroveshi dhe Luan Zaçe.

Në dosjen e përpiluar për këtë qëllim, Prokuroria thekson se te pandehurit, “kanë kryer punime të paligjshme, duke mos marrë lejen e ndërtimit nga organet kompetente në varrezat e vjetra të këtij fshati, të cilat ndodhen brenda meritorit të Kishës së Shën-Marisë në këtë fshat”.

Organet e hetimit kanë marrë prova të shumta në vendin e ngjarjes, si sasi prej 58 m2 beton e hedhur brenda varrezave ku është hapur një rrugë, duke mbuluar varret me beton si dhe janë ndërtuar disa shkallë. Pas përfundimit të veprimeve hetimore, prokuroria e Korçës e ka depozitar dosjen në Gjykatën e Rrethit për gjykim. /Start/