Apel i përsëritur!

Ndërkombëtarët vijuan me apelin e tyre ndaj klasës politike shqiptare, për t’i dhënë fund një krize më shumë se artificiale. Oferta e re e socialistëve për hetimin vetëm të materialeve zgjedhore, megjithëse ishte një hap përpara, nuk ka krijuar ende një atmosferë të re në skenën politike në vend.

Kryeministri Berisha e kërkon të shkruar ofertën, duke mos i besuar fjalimit të përsëritur të liderit të opozitës. Ndërsa partneri i tij në koalicion, Ilir Meta, është përqendruar në sulmin ndaj kreut opozitar, se pse ai ka ndryshuar qëndrim për hetimin e zgjedhjeve, duke vlerësuar se kriza nuk ekziston dhe se ajo është e krijuar artificialisht nga Rama.

Nga ana tjetër, opozita i ka mëshuar fort idesë për hetimin vetëm të materialeve. Por, nëse deri dje maxhoranca pranonte se ishte dakord për hetimin vetëm të kësaj “pjese” të zgjedhjeve, sot qëndrimet kanë ndryshuar, duke na rikujtuar se askush nuk është i interesuar për t’i dhënë fund ngërçit, që më së shumti dëmton integrimin e vendit dhe ecurinë e tij se sa politikanët që vijnë dhe shkojnë.

Shqipëria “fut në sherr” ndërkombëtarët!

Opinioni i Komisionit Evropian, jo vetëm në Shqipëri por edhe vetë në Parlamentin Evropian u vlerësua si jo realist në shumë drejtime. Drejtuesi i grupimit të djathtë në PE, Joseph Daul, akuzoi drejtpërsëdrejti Komisionin se nuk e ka vlerësuar realisht Shqipërinë, ndërsa ofroi mbështetje të pa kursyer ndaj kryeministrit Berisha i ndodhur përkrah tij në Bruksel.

I menjëhershëm qe reagimi i komisionierit për Zgjerimin, Stefan Fyle, i cili tha se raporti ishte pasqyrimin i realitetit shqiptar dhe se Shqipëria kaq meritonte. Se cili ka të drejtë apo jo, kjo nuk mund të thuhet, por ajo që dihet është se vlerësimet shpesh herë janë subjektive dhe se janë pasqyrim i asaj çka duket dhe jo asaj çka ekziston realisht.

Megjithatë, vlen të theksohet se Tirana zyrtare nuk i ka plotësuar kriteret e Kopenhagënit në fushën politike për shkak të ngërçit të krijuar që pas zgjedhjeve të shkuara. Parlamenti nuk funksionon normalisht dhe shumë ligje për reforma të mëdha kanë mbetur “peng” i një konflikti të vazhdueshëm i inateve të politikanëve. E pikërisht, këtu u vu theksi tek Opinioni i KE-së për vendin tonë.

Tashmë kur Shqipëria humbi një shans, duhet të presin nëntorin e vitit të ardhshëm për të marrë një vendim për statusin e vendit kandidat. E deri atëherë, nëse kriza do të jetë zgjidhur, vendi ynë do të marrë një përgjigje pozitive dhe evropianët nuk do të debatojnë më për “historitë” shqiptare, të paktën jo për kapriço të politikanëve.

Zgjedhjet në Rahovec, sukses i demokracisë kosovare

Zhvillimi i zgjedhjeve të parakohshme lokale në Komunën e Rahovecit është një tjetër dëshmi se Republika e Kosovës mund të zhvillojë zgjedhje në cdo kohë konform standardeve evropiane. Pozitiv është fakti se në to kanë marrë pjesë edhe votuesit serbë, megjithëse nga radhët e tyre nuk konkurroi asnjë subjekt politik. Të ndërgjegjësuar, komuniteti serb i kësaj komune iu drejtua kutive të votimit për të votuar një nga kandidatët shqiptarë.

Nga mbi 40 mijë votues që numëron Komuna e Rahovecit, 1500 prej të cilëve serbë, në zgjedhjet e së dielës morën pjesë rreth 40 për qind. Kandidati i LDK-së, Ibrahim Kryeziu, ndodhet në një avantazh të lehtë ndaj rivalit të PDK-së, Xhelal Canziba. Sipas “Demokracisë në Veprim”, Kryeziu ka marrë 27.7 %, ndërsa Canziba 27.48 %, çka i detyron këta dy kandidatë të kalojnë në balotazh, pasi asnjëri prej tyre nuk ka kaluar 50 përqindëshin.

Mbas 10 ditësh në Republikën e Kosovës fillon edhe fushata elektorale për zgjedhjet parlamentare të 12 dhjetorit, ku do të garojnë gjithsej 29 subjekte politike. Gara më e ashpër duket se do të jetë mes PDK-së së kryeministrit Hashim Thaçi dhe LDK-së së Isa Mustafës. Subjekte të tjera me peshë janë edhe AAK-ja e Ramush Haradinajt dhe Lëvizja “Vetëvendosje” e drejtuar nga Albin Kurti.

Orët e fundit janë shtuar zërat se koalicioni qeverisës pas zgjedhjeve do të krijohet nga PDK-ja e Thaçit dhe AAK-ja e Haradinajt. Lideri i LDK-së, Isa Mustafa ka përjashtuar çdolloj mundësie për të bashkëpunuar me kryeministrin në detyrë, ndërsa profili i krijuar nga “Vetëvendosje” e bën thuajse të pamundur një koalicion të saj me partitë tradicionale. Në këtë mënyrë, më e mundshmja është krijimi i koalicionit qeverisës mes PDK-së dhe AAK-së, kjo e fundit në koalicion parazgjedhor me “LDK-Lista Ibrahim Rugova”.

Megjithatë, zgjedhja i takon votuesve kosovarë, të cilët me vullnetin e tyre të lirë pritet t’i japin një leksion ndërkombëtarëve më 12 dhjetor, se Republika e Kosovës është në gjendje të zhvillojë zgjedhje sipas standardeve evropiane.