Vdesin 29 minatorët e bllokuar zelandezë

Në një minierë të Zelandës së re, ku ishin të bllokuar 29 vetë, është shënuar edhe eksplodimi i dytë, pas atij të parit, që ndodhi të premten.
Të mërkurën policia njoftoi për një shpërthim të dytë në minierë në Greymouth në South Island, fuqia e të cilit nuk lë shpresë për të mbijetuar. Policia tha se eksplodimi ishte aq i fuqishëm, që mund të ndodhë që askush nuk ka shpëtuar.

Kryeministri i Zelandës së Re, John Key, që i kishte paralajmëruar bashkatdhetarët për më të keqen, tha se vendi i tij ishte në zi.

"Njëzet e nëntë burra, emrat dhe fytyrat e të cilëve tani njihen nga të gjithë, nuk do të jenë kurrë më mes nesh. Kjo është një tragjedi kombëtare. Është tragjedi për familjet e tyre, për kolegët dhe miqtë, për komunitetin e tyre dhe gjithë vendin tonë. Zelanda e Re është një vend i vogël, një vend ku ne përkujdesemi për njëri-tjetrin si vëllai për vëllanë. Të humbësh kaq shumë vëllezër përnjëherë është një goditje shumë e rëndë. Sot Zelanda e Re mban zi për këta burra. Sot jemi një vend në zi", tha kreu i qeverisë neozelandeze.

Kryeministri i Zelandës së Re, John Key, tha se tani do të bëhet një hetim i plotë për shkaqet e shpërthimit me qëllim që tragjedi të tilla të mos përsëriten.

Përveç zelandezëve, mes viktimave ka edhe shtetas australianë dhe dy britanikë. Disa familjarë të minatorëve janë larguar me makina shëndetësore, pas shpalljes se minatorët ishin të vdekur.

Gazi metan në xeheroren Pike River, nuk ka lejuar ekipet e shpëtimit të hyjnë në minierë.