Kosova përgatitet për të festuar 28 Nëntorin

Prishtinë – Në Kosovë kanë filluar përgatitjet për të festuar 28 Nëntorin - Ditën e Pavarësisë së Shqipërisë.


Prishtina ka filluar të zbukurohet në cdo shesh me valëvitjet e flamujve kuqezi. Komuna e Prishtinës ka organizuar një program të pasur kulturor-artistik. Ndërkaq, Rrjeti i Organizatave Shqiptare ka paralajmëruar se do ta stolisë kryeqytetin me ngjyrat kombëtare kuq e zi, dhe se do të organizojë një koncert festiv me grupet më të njohura shqiptare.

Në sheshin ku gjithmonë qëndron i ngritur Flamuri Kombëtar, do të jetë nesër në mëngjes edhe presidenti në detyrë i Republikës së Kosovës, Jakup Krasniqi, për të vendosur lule në Monumentin e Gjergj Kastriotit – Skënderbeut.

Kreu i shtetit të Kosovës do të shkojë më pas në Prekaz për homazhe në Kompleksin Memorial “Adem Jashari”, ku nderojnë të gjithë shqiptarët. Homazhe heronjve, dëshmorëve, martirëve të lirisë e pavarësisë, do t’u bëhen në gjithë Kosovën.

Me emrin e Heroit, Komandantit legjendar Adem Jashari emërtohet Aeroporti Ndërkombëtar i Prishtinës, me ceremoninë që do zhvillohet në ditën e festës së 28 Nëntorit, ku është paralajmëruar pjesëmarrja e personaliteteve më të larta të Kosovës, Shqipërisë, Maqedonisë, etj.

Po nesër, nga Aeroporti i Prishtinës drejt Aeroportit të Tiranës dhe anasjelltas do të ketë fluturim promovues të një kompanie të re ajrore, e quajtur “Illyrian Airëays”.

Ndër veprimtaritë e shumta për nder të ditës së Flamurit dhe të Pavarësisë së Shqipërisë, do jetë edhe ajo e Lidhjes së Shkrimtarëve të Kosovës, e cila bën përurimin e numrit të parë të revistës letrare “Metafora”.

Në qytetin e Mitrovicës festa ka filluar me një program për fëmijë në Bibliotekën Ndërkomunale "Latif Berisha", ndërsa manifestimi qendror zhvillohet në Qendrën e Kulturës "Rexhep Mitrovica".

Në qytetin e Prizrenit, koncerti festiv do të organizohet rreth mesditës në sheshin "Shatërvan", ndërsa në mbrëmje do jetë koncerti i Shoqërisë Kulturore Artistike “Agimi” në Shtëpinë e Kulturës "Xhemajli Berisha".

Në Kaçanik, veprimtaritë filluan sot me vënien e luleve pranë memorialit të dëshmorëve dhe parakalimin e fëmijëve dhe të rinjve në bulevardin “Ismail Raka”, ndërsa me një eveniment kulturor në Shtëpinë e Kulturës “Xheladin Kurtaj”, u shënua 28 Nëntori – Dita e Flamurit Kombëtar, ditëlindja e Komandantit Legjendar Adem Jashari, dhe paraqitja e parë publike e Ushtrisë Çlirimtare të Kosovës.

Sipas Ligjit për festat zyrtare të Republikës së Kosovës, 28 Nëntori nuk radhitet në këto festa, por në "ditët memoriale", si "dita e shqiptarëve". Megjithatë, kudo shqiptarët në Kosovë e festojnë këtë ditë, si Ditë të Flamurit Shqiptar dhe të Pavarësisë së Shqipërisë.