Titujt, 10 vjet punë për t’u bërë “Mësues specialist”

Burime nga Ministria e Arsimit bëjnë me dije se standardet e reja për arsimtarët janë hartuar tashmë. “Janë hartuar dhe janë në proces miratimi, draftet e standardeve të mësuesve, drejtuesve të shkollave dhe këshilltarëve pedagogjikë”, sqarojnë burimet. Kualifikimi i vazhduar do të zhvillohet në dy etapa. Por ndryshe nga sa tani, nuk do të ketë më shkallë karriere, por tituj karriere. Etapa e parë do të përfshijë portofolin profesional të mësuesit, i cili përmban CV-në dhe dokumente e certifikata të fituara gjatë periudhës në fjalë. “Portofoli vlerësohet nga një komision i ngritur pranë DAR/ZA-së ku mësuesi punon”, sqarojnë specialistët. Ndërkaq, etapa e dytë përfshin testimin. Në këtë etapë kalojnë mësuesit që kanë paraqitur portofolin dhe janë vlerësuar mbi një numër minimal pikësh. Mësuesit i nënshtrohen provimit mbi bazën e një testi. Vlerësimi përfundimtar mbështetet në kreditet e grumbulluara dhe rezultatet e testimit. “Nëpërmjet këtij sistemi, diferencohet paga e mësuesve sipas meritës profesionale. Një sistem i ngjashëm po përgatitet edhe për drejtuesit e shkollave”, nënvizojnë specialistët e MASH-it. Titujt do të nisin nga “Mësues fillestar” (sapo ka marrë diplomën fillestare të mësuesisë), “Mësues”, “Mësues i licencuar”, “Mësues specialist” dhe më e larta “Mësues mjeshtër”. Secila shkallë do të përshkruhet nga lista specifike e standardeve. Titulli i karrierës jepet për një lëndë ose fushë lëndore dhe për një grupmoshë të nxënësve. Për marrjen e licencës, mësuesi duhet të ketë kryer minimalisht një vit mësim dhe maksimalisht 4 vjet mësim në arsimin përkatës. Nëse mësuesi fillestar nuk aplikon për katër vjet rresht për titullin “Mësues”, ai e humbet të drejtën e ushtrimit të profesionit të mësuesisë. Gjithashtu, është përcaktuar që paga e mësuesit fillestar të jetë shumë afër asaj të mësuesit të shkallës pasuese të karrierës, në mënyrë që të mos defavorizohet mësuesi fillestar. Marrja e titullit nga mësuesit do të kushtëzohet edhe nga testimet specifike. Kështu, titullin e karrierës, mësuesi aplikues do ta sigurojë përfundimisht vetëm pasi të kalojë në provimin përfundimtar. Me vendosjen e standardeve do të përcaktohen edhe kushtet që duhet të plotësojnë arsimtarët për të dhënë mësim në ciklin parauniversitar. Më të forta do të jenë kriteret për arsimin e mesëm. Mësuesit e gjimnazeve duhet të përfundojnë masterin shkencor. Ata gjithashtu duhet të zotërojnë një gjuhë të huaj dhe aftësi për të dhënë një lëndë tjetër mësimore. Nëse ata nuk do të arrijnë të përfundojnë këto kualifikime, do të largohen nga puna. Për rrjedhojë, duke filluar nga viti 2013, asnjë arsimtar në shkollat e mesme nuk do të punësohet, nëse nuk do të ketë mbaruar një Master, nuk zotëron një gjuhë të huaj dhe kompjuterin.

Shkallët e karrierës
Akutalisht, provimit të kualifikimit i nënshtrohen çdo vit të gjithë mësuesit, të cilët mbushin 5, 10, 20 vite punë në arsim, deri në fund të vitit paraardhës. Mësuesit që deri në datën 31 dhjetor 2009 do të kenë punuar 5 vjet punë si arsimtar, kanë të drejtë të aplikojnë për shkallën e tretë të kualifikimit. Në shkallën e dytë të kualifikimit do të pranohen për t’u testuar arsimtarët që kanë punuar 10 vjet në arsim. Për shkallën e parë të kualifikimit, një mësuesi i duhet të ketë punuar plot 20 vjet arsim. Në bazë të këtij kategorizimi, mësuesi përfiton shtesë në pagë, që për kategorinë
e tretë është plus 5 për qind, për të dytën plus
10 për qind dhe për të parën plus 20 për qind.