Hillary Clinton uron shqiptarët për 28 Nëntorin

Tiranë, 27 nëntor – Sekretarja amerikane e Shtetit, Hillary Clinton i ka uruar popullit shqiptar Ditën e Pavarësisë – 28 Nëntorin. Në mesazhin e urimit i mbajtur edhe në emër të presidentit Obama dhe të popullit të SHBA-ve, Clinton nënvizon se “historia e miqësisë dhe interesat e përbashkëta mes Shqipërisë dhe SHBA-ve u konsoliduan në Konferencën e Parisit të vitit 1919, kur Presidenti Wudrow Willson mbështeti fuqimisht pavarësinë e Shqipërisë”.

Clinton vlerësoi rolin e Shqipërisë për paqen dhe sigurinë e Ballkanit Perëndimor si dhe angazhimin në misionin ndërkombëtar në Afganistan vitet e fundit.

“Që prej atëherë, Shqipëria ka dhënë një ndihmesë të çmuar për paqen dhe sigurinë në Ballkanin Perëndimor. Si partnere e NATO-s dhe si këshilltare e vendeve të tjera të Ballkanit që aspirojnë të bëhen anëtare të NATO-s, Shqipëria luan një rol të rëndësishëm dhe aktiv për avancimin e integrimit dhe stabilitetit rajonal. SHBA-të e respektojnë gjithashtu angazhimin e Shqipërisë në misionin ndërkombëtar në Afganistan dhe dedikimin e saj për mbrojtjen e paqes në botë”, thuhet në mesazhin e Clintonit, të botuar dje në faqen online të Departamentit Amerikan të Shtetit.

Ajo ka vlerësuar se heqja e vizave për Shqipërinë është “një tregues i fortë i përparimit që vazhdon të bëjë vendi juaj drejt anëtarësimit të plotë në komunitetin euro-atlantik” dhe ka theksuar se “mbështetja e SHBA-së për anëtarësimin e Shqipërisë në Bashkimin Evropian mbetet e fuqishme.”

Duke shprehur optimizmin “vazhdueshmërinë e partneritetit me Shqipërinë për çështje me rëndësi rajonale dhe globale”, Clinton mbyll mesazhin e saj drejtuar popullit shqiptar me urimin: “I uroj të gjithë popullit shqiptar festime të mbara dhe të gëzueshme të Ditës së Pavarësisë”.

Dita e Pavarësisë u urua dhe nga presidenti amerikan Barack Obama nëpërmjet një mesazhi që i kishte dërguar dje presidentit shqiptar Bamir Topi.