Kosova e zbukuruar me flamuj, festohet Pavarësia e Shqipëris

PRISHTINË- Flamujt kuq e zi kanë mbushur kryeqytetin e Kosovës, Prishtinën, me rastin e 28 Nëntorit ditës së Pavarësisë së Shqipërisë.
Megjithëse 28 Nëntori nuk radhitet në mesin e festave shtetërore në Kosovën që u shpall e pavarur në 17 Shkurt 2008, kjo ditë që kosovarët e quajnë edhe si dita e Flamurit Kombëtar, vazhdon të kremtohet në forma të ndryshme.
Mijëra shqiponja dykrenare "fluturojnë" nëpër rrugë dhe sheshet e Prishtinës, që janë "veshur" me ngjyrat kombëtare kuq e zi nga Rrjeti i Organizatave Shqiptare, që kanë paralajmëruar dhe koncerte me grupet më të njohura.
Bashkia e Prishtinës, nga ana e saj, ka planifikuar një numër aktivitetesh festive, përfshirë dhe një program të pasur kulturo-artistik, ndërsa kjo ditë do të festohet deri natën vonë në të gjithë Kosovën.
Në sheshin ku ndodhet monumenti i Gjergj Kastriot Skënderbeut, pritet që krerët më të lartë të vendit të vendosin kurora me lule, për t'u zhvendosur me pas në Prekaz, në Kompleksin Memorial Adem Jashari, ku nderojnë të gjithë shqiptarët.
Kryeministri në detyrë, Hashim Thaçi dhe Presidenti në detyrë, Jakup Krasniqi do të marrin pjesë dhe në ceremoninë e zbulimit të pllakës së emërtimit të Aeroportit Ndërkombëtar të Prishtinës me emrin e Heroit, Komandantit Legjendar, Adem Jashari. Në këtë ceremoni është paralajmëruar pjesëmarrja e personaliteteve të larta edhe nga Shqipëria, Maqedonia, etj.
Dita e Flamurit dhe e Pavarësisë së Shqipërisë, si ditë e gjithë kombit, festohet tradiconalisht në Kosovë, edhe kur kjo festë ishte e ndaluar nga serbët.
Për të tretin vit e gjithë Kosova e feston e pavarur ditën e Pavarësisë së Shqipërisë dhe për të 12-ën herë nga viti i lirisë, 1999. Shteti më i ri evropian, Kosova, deri sot është njohur nga 72 vende anëtare të OKB-së.