Liri e kufizuar për Qetsorin e BB2

Qetsor Ferunaj, fituesi i “Big Brother 2” nuk do ta provojë të paktën për ca kohë lëvizjen pa vizë në vendet shengen, duke mos pasur shansin të shijojë liberalizimin e vizave. Ky kufizim i lirisë i Qetsorit që jeton në Dukat të Vlorës është vendosur me vendim gjykate pas lirimit të tij nga dhomat e izolimit të Komisiariatit të Vlorës bashkë me 14 banorët e fshatit Dukat pak ditë më parë. Bashkë me vendimin për lirimin e tij që u dha në seancën gjyqësore të sigurisë, iu njoftua dhe kushti për “detyrim paraqitjeje”. Prokurori i çështjes, Dritan Marku, parashtroi akuzën për grumbullimin e paligjshëm, kundërshtim të forcave të policisë, mbajtje të lëndëve luftarake si dhe nxitjen me megafon të masës së protestuesve kundër policisë, ditën e protestës pak ditë mëparë. Por duke marrë parasysh edhe faktin e vetëdorëzimit të Ferunajt avokati i tij duke iu referuar kësaj rrethane lehtësuese kërkoi si masë sigurimi “detyrimin për paraqitje” në një orar të përshtatshëm për paraqitjen e tij në prokurori. Bashkë me këtë vendim, Qetsori është informuar se tashmë do të jetë i kufizuar për të udhëtuar jashtë Shqipërisë, ndërkohë që Gjykata vendosi të lërë masën me detyrim paraqitjeje të tij çdo ditë të hënë, në fillim të çdo muaji. “Kisha plan të udhëtoja drejt Italisë ku kam jetuar shumë vite, për të përfunduar disa dokumente atje, por m’u komunikua që tashmë e kam të ndaluar udhëtimin jashtë vendit”, tha Qetsori për “Panorama Plus’. Ai ishte një nga protestantët e Dukatit për marrjen e certifikatave të pronësisë. Nuk zgjati shumë shpallja në kërkim e Qetsor Ferunajt pasi ai vendosi të vetëdorëzohej. Tashmë ai i është rikthyer jetës normale në familjen e tij me dy fëmijët dhe bashkëshorten, si dhe studimeve për Shkenca Politike në një universitet privat në Vlorë. Qetsor Ferunaj, i cili fitoi “Big Brother 2”, nuk u përfshi në botën e televizionit siç bënë shumë ish-konkurrentë në këtë “reality show”. Ambiciet e tij janë për t’u përfshirë në politikë, ndërkohë që muajt e fundit ai është angazhuar vetëm me çështjen e pronave të banorëve të fshatit Dukat, duke qenë një nga drejtuesit e kësaj iniciative.