Kërkohet evakuim urgjent, i banorëve të Torovicës në Lezhë

Kryeministri i Shqipërisë, Sali Berisha ka kërkuar evakuimin e banorëve të Torovicës, në Lezhë të cilët rrezikohen seriozisht nëse argjinaturat pritëse të ujit çahen.


Kryeministri tha se kjo është një nga zonat më delikate dhe më të rrezikshme, pasi pak centimetra ndajnë pjesën më të lartë të digës nga uji që ka një thellësi prej 67 metrash dhe që mund të vërshojë drejt Torovicës dhe më tutje duke shkaktuar dëme të pallogaritshme.

Berisha ka bërë të ditur se po punohet për lartësimin e argjinaturës por kërkoi evakuim si masë e nevojshme për të siguruar se nuk do të ketë dëme në jetë njerëzish.

“Ushtria dhe kompani privat kanë 24 orë që po bëjnë çdo gjë për të lartësuar digën. Janë hedhur deri më tani mijëra metër kub çakull, dhera dhe në zona të caktuara, në qoftë se ajo nuk do të ishte lartësuar, derdhja në Torovicë do të kishte filluar me kohë. Detyrimisht të fillojmë shpërnguljen e banorëve në Shëngjin dhe të mbetet vetëm nga një njeri në shtëpi, të vendoset një sistem alarmi dhe zona duhet të zbrazet. Ne po bëjmë dhe do të bëjmë çdo gjë për ta përmbajtur dhe që uji të mos kalojë mbi argjinaturë, por, nga ana tjetër, forca natyrore është forcë natyrore dhe jo në çdo rast ajo është e dominueshme,”- u shpreh Kryeministri gjatë inspektimit të zonës.

Më pas, Kryeministri Berisha u ndal edhe në Drejtorinë e Përgjithshme të Rezervave të Shtetit në Gjadër, ku është njohur nga Drejtori Hysen Arapi me furnizimin me ushqime, ujë dhe çdo gjë që nevojitet në këtë situatë, i cili informoi se janë më të avancuar me rezervat ushqimore, sesa është kërkesa.