Mësuesit detyrohen lekët e shpërblimit shkojnë për Shkodrën

TIRANE- Me listë prezencë për para dhe me një fletë ku shënohej; “Unë jap shpërblimin tim në ndihmë të familjeve shkodrane”, qindra mësues të Tiranës janë detyruar të firmosin prej zorri shpërblimin e fundvitit për ngjarjet në veri.
Kjo situatë ka ndodhur në pjesën më të mirë të shkollave, e ndërsa mësuesit e pranojnë nën zë, drejtorët thonë se po ndërmarrin iniciativa kolektive për ti ardhur në ndihmë familjeve në nevojë.

Në vend janë 34 mijë mësues ndërsa sipas llogarive, i bie që shuma e shpërblimeve të tyre të arrijë shifrën 340 milionë .
“Ne mezi e presim atë shpërblim në fund të vitit, këta edhe atë duan të na e marrin. Po ç’të bëjmë, nuk kundërshtojmë dot, se duam të punojmë edhe vitin tjetër, kush nuk hedh firmën, rrezikon dhe vendin e punës”, shprehet një nga mësueset e Tiranës, e cila me frikën se mos e kap ‘fshesa’ kërkon të mos i publikohet emri.

Pushtetarët janë duke bërë motivim psikologjik me arsimtarët, të cilët përbëjnë pjesën më të madhe të administratës publike, duke u përpjekur të prekin sado pak ndjeshmërinë e tyre, me qëllim marrjen e 90 mijë lekëshit të plotë. Për të arritur këtë qëllim ato janë duke përdorur jo pak edhe drejtuesit e shkollave, të cilët në mbledhjet që kanë bërë me këshillin pedagogjik, kanë dhënë modelin e tyre të mirë, duke u thënë kolegëve se ato do ta jepnin të gjithë shpërblimin e tyre.

Për shkolla të veçanta është aplikuar kjo skemë në të gjithë stafin, ndërsa në disa të tjera kolektivi i mësuesve nuk ka rënë dakord, duke propozuar mbajtjen e një pjese të kontributit. Disa shkolla kanë rënë dakord për të dhënë 10 mijë lekë të vjetra në ndihmë të banorëve, të tjera diçka më shumë, në disa të tjera 50 mijë, e kështu me rradhe, deri tek ato që e kanë dhuruar të gjithë pagën shtesë (shpërblimin) për të përmbyturit. /