Një muaj paraburgim 8 të dyshuarve për “Sim to Sim”

Gjyqtari i procedurës paraprake në Gjykatën e Qarkut në Prishtinë, ua ka shqiptuar masën e paraburgimit 8 të dyshuarve, nga 11 sa ishin arrestuar nga policia, për rastin “Sim to Sim”, shkruan Koha.net.

Vendimi për caktimin e paraburgimit është marrë me arsyetimin se të dyshuarit, si grup, kanë kryer vjedhje të rëndë dhe i kanë shkaktuar dëme me miliona euro Postës dhe Telekomit të Kosovës.

Njoftimi për caktimin e paraburgimit është dhënë nga Policia e Kosovës, të cilët po ashtu kanë bërë të ditur se hetimet për fenomenin “Sim to Sim”, janë shtrirë në tetë vende të Evropës.

“Drejtoria për hetimin e krimeve ekonomike dhe korrupsionit, (DHKEK), ka vazhduar procesin hetimor lidhur me operacionin “Sim to Sim” dhe është aktualisht duke vazhduar bashkëpunimin edhe me disa shtete të Evropës me dyshimin se rrjeti i personave të arrestuar ka pasur bashkëpunim me të dyshuar nga këto shtete të Evropës”, thuhet në një njoftim të lëshuar nga policia, ku nuk janë dhënë edhe emrat e shteteve.