Dashuria për rumunen, shqiptarët qëllojnë njëri-tjetrin

ITALI Një shqiptar ka mbetur i vrarë në Itali, pas një sherri xhelozie me një shqiptar tjetër. Flamur Rexhepi, 30 vjeç, qëlloi për vdekje 27-vjeçarin Alket Saliajn, në periferi të Villa Liternos, në Kasertano. Mediat italiane raportojnë se shkak për zënkën mes shqiptarëve u bë rivaliteti në dashuri për një grua rumune, emigrante në Itali. Sipas policisë që hetoi krimin, vrasja u krye me një armë ilegale. Nga ana e tij, Flamur Rexhepi është gjetur i plagosur me thikë në mes të rrugës, në disa pjesë të trupit. Pas arrestimit nga policia, ai ka rrëfyer se gjatë sherrit për një vajzë rumune, Saliaj ka nxjerrë një thikë dhe e ka goditur disa herë më të. “Unë reagova për vetëmbrojtje” - i ka pohuar ai policisë italiane. Punonjësit e policisë kanë gjetur trupin e Alket Saliajt të dalë nga makina në rrugën “Santa Maria”, ndërsa autorin e vrasjes e kanë dërguar fillimisht në spital, ku është nën kujdesin e mjekëve për plagët e marra. Mediat italiane raportojnë se është shoqëruar në polici edhe 29-vjeçarja rumune, “molla e sherrit” mes shqiptarëve, e cila është marrë në pyetje për ngjarjen. E cilësuar si dëshmitare okulare, ajo ka qenë e pranishme gjatë përleshjes së shqiptarëve, ku njëri mbeti i vrarë me pistoletë dhe tjetri i plagosur në disa pjesë të trupit.