I ftohti polar, në Korçë minus 7 gradë

Korçë I ftohti prej 24 orësh ka mbërthyer përsëri juglindjen, temperaturat shkojnë disa gradë nën zero, akset nacionale nën kontroll të plotë. Ndonëse reshjet e dëborës nuk janë rishfaqur prej të paktën dy javësh në qarkun e Korçës, temperaturat e ulëta të një dimri të vërtetë siberian janë rikthyer përsëri. Prej të paktën 24 orësh, i gjithë qarku juglindor i vendit është i përfshirë nga një mot i ftohtë, megjithëse nuk ka reshje dëbore. Ndërkaq, Policia e Shtetit por dhe ndërmarrja e rrugëve nacionale kanë vënë gjithçka në gatishmëri të plotë për disa akse që janë të mbuluara nga akulli, për shkak te temperaturave që kanë shkuar deri në -7 gradë celcius. Qarkullimi i madh i automjeteve për shkak të fluksit të mjeteve të emigrantëve që kanë mbërritur për festa në Shqipëri, Policia e Shtetit ka shtuar kontrollet në akset më kryesore, sidomos në segmentin Korçë-Kapshticë, ku dhe lëvizja e automjeteve është shumë e madhe. Sipas shërbimit sinoptikan të Komandës Ushtarake Mbështetëse në Korçë, temperatura më e ulët në kryeqendrën e juglindjes gjatë ditës së martë ka qenë -5 gardë celcius në mëngjes, teksa ajo më e larta e regjistruar nga termometri në mesditë ka qenë -3 gradë celcius. Ndërkaq në qytetin e Ersekës, në cepin më juglindor të Shqipërisë, por dhe në zonat turistike të Voskopojës dhe Dardhës, temperatura më e ulët ka qenë -7 gradë celcius. Nisur nga këto kushte të reja të motit, Drejtoria Rajonale e Rrugëve Nacionale në Korçë, ka marrë të gjitha masat për të pasur situatën nën kontroll të plotë, në rast dhe të rifillimit të rreshjeve të borës, por dhe të sasive të kripës dhe skorjes të nevojshme për këto raste. Sipas numrit një të kësaj ndërmarrje, Kreshnik Zgjani, mësohet se në rrugët Korçë-Kapshticë, Korçë-Pogradec, Pogradec-Qafë Thanë dhe Korçë-Ersekë janë të kalueshme. Në disa segmente, për shkak të terrenit të thyer malor, Drejtori i Drejtorisë Rajonale të Rrugëve Nacionale, Kreshnik Zgjani, bën të ditur se rrugët kanë paraqitur probleme. Duke iu referuar këtij informacioni, mësohet se në Qafën e Qarrit në aksin Korçë-Ersekë, në Qafë-Plloçë dhe Qafën e Thanë, në segmentin nacional Korçë-Pogradec, për shkak të ngricave dhe të akullit, kalohet me vështirësi dhe vetëm me zinxhirë. Policia e qarkullimit rrugor nga ana e saj po patrullon duke kërkuar nga drejtuesit e automjeteve të kenë me vete pajisjet dimërore, ndërsa nga ana tjetër mjetet borëpastruese, por dhe kripa, skorja etj., janë në gatishmëri për momentet e vështira të stinës së dimrit, të njohura në qarkun e Korçës. Për fat të mirë, aksi kombëtar që lidh Shqipërinë me Greqinë në Korçë-Kapshticë nuk ka pasur probleme nga ngrica dhe akulli, ndërsa mbikëqyrja e tij është 24 orë non-stop, ashtu si dhe në segmente të tjera po kaq të rëndësishme.