Skënderbeu “blindon” Sozën

Presidenti Agim Zeqo nuk e ka lejuar largimin e lojtarit argjentinas duke i vënë në pjatë një kontratë vërtet të majme

Rafel Soza edhe 6 muaj kontratë me korçarët. Argjentasi konfirmon nga telefoni qëndrimin te Skënderbeu dhe mbërrin në fundjavë në Shqipëri. Pavarësisht se do t’i duhet të jetojë në një qytet ku i ftohti nuk e bën të ndihet mirë dhe i ka sjellë deri dhe probleme shëndetësore, ka gjetur ngrohtësinë e banorëve të tij, tifozerisë, por dhe një kontratë të majme që nuk ka ndryshuar si në 6 muajt e parë tashmë të konsumuar me juglindorët. E, në këto kushte nuk kishte se si të mos vazhdonte të ishte pjesë e bardhekuqve, me të cilët i ka mbyllur bisedimet telefonikisht. Burime nga presidenca korçare i kanë bërë të ditur gazetës se lojtari e ka shtyrë udhëtimin e tij drejt Shqipërisë për disa ditë. Argjentinasi ka kërkuar leje deri në datën 9 janar për të qenë së bashku me të afërmit e tij në një festë familjare. Lojtari mësohet se do të kthehet në datën 9 janar, ditë kur pasi të mbërrijë në Tiranë do të marrë një tjetër avion për të udhëtuar drejt Turqisë, për t’iu bashkuar ekipit që ka mbërritur në Antalia ndërkohë nga dita e mërkurë. Pas përfundimit të kampionatit një ditë para festës së Krishtlindjes, Soza ka bërë të ditur për gazetën se “nuk e kishte vendosur se me cilën skuadër shqiptare do të vazhdonte të qëndronte”, ndërsa nuk ka mohuar interesin e disa ekipeve të njohura në vend që kërkonin shërbimet e tij, përfshi këtu dhe një rikthim të mundshëm tek ekipi i Dinamos. Argjentinasi i ka lënë të gjithë në dilemë, ndërkohë që disa ekipe kryeqytetase shpresonin në një miratim të lojtarit në favor të tyre. Por duket se korçarët kanë qenë më afër futbollistit që ka shpërthyer në sulmin dhe mesfushën korçare pasi funksiononte më së miri në të dy repartet, duke qenë shumë i dobishëm për ekipin e drejtuar nga Shkëlqim Muça. Por, nëpërmjet telefonit, Soza ka mbyllur marrëveshjen me juglindorët, duke vazhduar të jetë pjesë e këtij ekipi, që është bërë ndër më pretendentët për titullin kampion pas katër blerjeve të fundit shumë të rëndësishme për ta, por dhe konfirmimit të një lojtari ndër më të mirët në skuadër. Mësohet se futbollisti ka patur kontakte të drejtpërdrejta me presidentin e Skënderbeut, Agim Zeqo, i cili e ka bindur të qëndrojë në Korçë. Qëndrimi i këtij lojtari me shumë peshë në ekip është një tjetër arritje e bardhekuqve, të cilët kanë patur një merkato intensive dhe me katër blerje shumë të vlefshme për ta. Kështu Muzaka, Arapi, Cikalleshi dhe shqiptaro-maqedonasi Idrizi janë veshur bardhekuq, teksa një serb është në provë për disa ditë te skuadra.