Shamia islamike, imamët kundër ligjit të ri

Këshillat e xhamive të Tiranës dhe imamët e tyre i kërkojnë Ministrisë së Arsimit të bëjë disa shtesa në projektligjin e ri për arsimin parauniversitar, të cilat të sanksionojnë lejimin e shamive të femrave myslimane në shkolla, pasi sipas tyre, kjo nuk e cënon laicitetin e institucioneve arsimore.


“Këshillët e xhamive kërkojnë nga Ministria e Arsimit të bëjë disa riformulime nga të cilat të kuptohet qartë se veshja e shamisë nga femrat myslimane nuk ndalohet nga institucionet arsimore. Ky vendim shmang tensionet sociale, nuk pengon mësimin dhe shton bashkëpunimin e komunitetit mysliman me shtetin”, ka deklaruar Genc Plumbi, teolog mysliman.

Përfaqësuesit e xhamive kanë theksuar se shamia që vendosin vajzat myslimane nuk është simbol fetar, por pjesë e identitetit fetar islam dhe pjesë e trashëgimisë kulturore.

“Të shqetësuar nga këto interpretime, ne ritheksojmë se mbajtja e shamisë së kokës dhe jo mbulimi i fytyrës, nuk është një veprim fetar, por një veprim që ka të bëjë me kulturën tonë”, ka shtuar Plumbi.

Sipas përfaqësuesve të xhamive dhe imamëve, ndalimi mbajtjes së shamive në shkollat e sistemit parauniversitar cënon praktikimin e lirë të fesë, si dhe të drejtën për lirinë e shfaqjes publike të fesë, cka sipas tyre do të përkthehej në diskriminim.