Marty shërbehet me “të dhëna” serbe

Komisioni për personat e zhdukur dhe Qeveria e Serbisë janë të gatshëm që pa kurrfarë kushtëzimesh të fillojnë bisedimet me Prishtinën, ka deklaruar kryetari i këtij komisioni Veljko Odalloviq në konferencë me gazetarë të premten. Sipas tij, kur bëhet fjalë për të zhdukurit, janë zgjidhur rreth 1 500 raste në Kosovë, dhe se në këtë moment janë edhe rreth 1 800 raste të hapura, prej të cilave në 526 bëhet fjalë për kërkesë të Serbisë, kurse të tjerat raste janë kërkesa të Kosovës.

Duke u përgjigjur në pyetjen se mos vallë në mesin e personave të zhdukur mund të ketë edhe të tillë që janë viktima të trafikimit të organeve, Odalloviqi ka thënë se numri më i madh i serbëve është zhdukur pas arritjes së misionit ndërkombëtar, dhe se kjo periudhë në masë të madhe përputhet me atë që ka folur Carla del Ponte në librin e saj.
Ai ka saktësuar se mbi 400 persona janë zhdukur pas 10 qershorit të vitit 1999, dhe ka shtuar se “llogoret për stërvitjen e terroristëve kanë qenë në afërsi të vendeve për të cilat flitet tashti”.
Në Batajnicë, Petrovo selo dhe Peruçac janë nxjerrë trupat e 836 shqiptarëve të Kosovës dhe deri tash janë identifikuar 764, ka saktësuar ai, duke shtuar se të gjith mbetjet mortore i janë dorëzuar UNMIK-ut.
“Raportin komplet për të zhdukurit dhe analizat e mundshme të zhdukjeve, si dhe emrat e njerëzve që janë të lidhur direkt me ato krime ia kam dorëzuar raportuesit të Këshillit të Evropës Dick Martyt”, ka thënë në fund Odalloviqi.