Protesta, BE: Hetim i plotë. Liderët të gjejnë zgjidhje.....

Protesta, BE: Hetim i plotë. Liderët të gjejnë zgjidhje me dialog dhe pa dhunë

BE ka tërhequr sërish vëmendjen e politikës shqiptare, acaruar së fundi pas demonstratës së 21 janarit, duke kërkuar hetim gjithëpërfshirës për sa ndodhi dhe për zgjidhje të paqtë të mosmarrëveshjeve. Në një deklaratë për mediat, Natasha Butler, zëdhënësja e komisionerit për Zgjerim, Stefan Fule apelon për bashkëpunim mes palëve politike, përmes qetësisë dhe jo me dhunë.

“Nga kriza aktuale mund të dilet përmes bashkëpunimit të partive dhe përqendrimin në axhendën e BE-së për të përmbushur të ardhmen evropiane të vendit. Jemi duke ndjekur situatën nga afër dhe jemi në lidhje edhe me institucione dhe vende të tjera. Është shumë e rëndësishme të ruhet qetësia dhe të mos përsëritet dhuna. Është shumë e rëndësishme që liderët të përqendrohen në zgjidhjet që mund të gjejnë së bashku. Gjithçka është në dorën e dy liderëve politikë në Shqipëri. Shqipëria ka kërkuar t’i bashkohet BE-së dhe u takon dy liderëve që të gjejnë zgjidhjen. Liderët duhet të tregojnë përgjegjësi politike”, është shprehur Butler.

Sipas saj, BE nuk mund të thotë se kush është përgjegjës për të premten, por është e rëndësishme që të përdoret retorika e qetësisë dhe palët të angazhohen për zgjidhje politike të kësaj krize.

Butler ka theksuar se janë disa prioritete kyç të kërkuara nga BE dhe një prej tyre është që të arrihet një shumicë e duhur në parlament që të miratohen disa ligje të caktuara në mënyrë që Shqipëria të siguroj të ardhmen evropiane.