Shkodër, uji 1.5 metër, Turqia e Greqia sjellin 5 helikopter

Shkodër, uji 1.5 metër, Turqia e Greqia sjellin 5 helikopterë, Italia ndihma ushqimore

Zëdhënësi i shtabit të Emergjencave Civile në Shkodër, Leonard Olli, ka njoftuar se pak minuta më parë në Rinas, kanë mbërritur dy helikopterët ndihma të ardhur nga Greqia.
Sipas Ollit, njëri helikopter ka kapacitet transportues një ton dhe tjetri tre tonë. Dy helikopterët së bashku me tre helikopterë të tjerë nga Turqia, pritet që nesër në mëngjes të fillojnë operacionet për evakuimet në zonën e Shkodrës si dhe furnizimin me ushqime, ujë dhe ilaçe.
“Është bërë furnizimi i të gjithë banorëve në të gjitha zonat e përmbytura. Komuna e Velipojës më e izoluara është furnizuar nga deti. Gjithsej janë evakuuar 11500 banorë”, ka thënë zëdhënësi i shtabit të emergjencës.
Sipas tij, tre trajlera me ushqime pritet të mbërrijnë ditën e djelë nga Italia dhe menjëherë do të transportohen drejt Shkodrës.
Ndërkohë, sipas të dhënave të fundit nga terreni, mësohet se niveli i ujit në zonat rreth Shkodrës kalon 1.5 metra. Në qytet në zonat e përmbytura uji ka arritur 1,3 metra ndërkohë që në disa fshatra uji është në nivelin 80 centimetër.